Եղիսաբէթ Բ թագուհին Վատիկան պիտի այցելէ յառաջիկայ 3 ապրիլին` առաջին հանդիպումը ֆրանչիսկոս Քահանայապետին հետ։

Անգլիոյ Եղիսաբէթ Բ թագուհին ու անոր կողակիցը` իշխան ֆիլիփ, Վատիկան կ'այցելեն յառաջիկայ 3 ապրիլին։
Անոնք Հռոմ կու գան Իտալիոյ հանրապետութեան նախագահ Ճորճօ Նափոլիթանոյի հրաւէրով։
Այս առաջին անգամն է որ Անգլիոյ Թագուհին, որ կը կրէ Անգլիոյ Եկեղեցւոյ Գերագոյն Կառավարիչի տիտղոսը, տեսակցութիւն կ'ունենայ ֆրանչիսկոս Քահանայապետին հետ։
Յայտնենք որ Թագուհիի եւ Սրբազան Քահանայապետի մը միջեւ վերջին հանդիպումը տեղի ունեցաւ սեպտեմբեր 2010-ին, երբ Պենետիկտոս ԺԶ Քահանայապետը հովուական այցելութիւն կատարած էր Անգլիա։
Եղիսաբէթ Թագուհիին Վատիկան կատարած վերջին այցելութիւնը տեղի ունեցաւ հոկտեմբեր 2000-ին, ուր 20 վայրկեան առանձնական խօսակցութիւն ունեցաւ Յովհաննէս Պօղոս Բ Քահանայապետին հետ։ Նախապէս ան Սրբազան Հօր հետ հանդիպում ունեցած էր 1980-ին։ Եղիսաբէթ Բ Թագուհին 1961-ին հանդիպում ունեցած էր նաեւ Յովհաննէս 23-րդ Քահանայապետին հետ։ Նշենք որ այս վերջին երկու Քահանայապետներու սրբադասումը պիտի կատարուի յառաջիկայ 27 ապրիլ 2014-ին, ս. Պետրոսին մէջ։